ИСТИҚБОЛИ ГАРМИ КОМРОНШОҲ ДАР ГУЗАРГОҲИ САРҲАДИИ “ФОТЕҲОБОД-ОЙБЕК”

Имрӯз, 3 декабри бо иштироки муовини раиси ноҳияи Мастчоҳ Шавкат Солеҳиён, сардори Раёсати кор бо ҷавонон ва варзиши вилояти Суғд Мирқосим Каримзода, раиси КИ ҲХДТ дар ноҳияи Мастчоҳ Дилшод Зокиров,  устоди варзиши Тоҷикистон Устопир Устопириён ва чанде аз мухлисон дар гузаргоҳи сарҳадии “Фотеҳобод-Ойбек” Комроншоҳи Устопириён, барандаи медали нуқраи бозиҳоҳои“Abu Dhabi Grand Slam 2021” гарму самимӣ истиқбол гардид.

Комроншоҳи Устопириён дар бозиҳоҳои “Abu Dhabi Grand Slam 2021”, ки рӯзҳои 26-28-уми ноябр дар пойтахти Имороти Муттаҳидаи Араб – шаҳри Абу Забӣ – баргузор гардида буд, дар вазни то 90 кг қувваозмоӣ намуда, медали нуқра ба даст овард. Комроншоҳ баъди се пирӯзӣ бар рақибонаш Ҷамол Петргрейв аз Бритониё, Ҷон Ҷейн аз Иёлоти Муттаҳидаи Амрико ва Эрлан Шеров аз Қирғизистон ба финал баромад, вале дар қувваозмоии ниҳоӣ ӯ аз варзишгари 21-солаи русиягӣ Мансур Лорсанов мағлуб шуд ва бо медали нуқра сарфароз гардид.

Гуфта мешавад дар ин мусобиқа ҳамчунин ҷудокорони муваффақи кишвар Ҷаҳонгир Маҷидов зери вазни -90 кг ва Темур Раҳимов дар вазни беш аз 100 кило ба гирифтани нишонҳои биринҷӣ шарафёб гардиданд. Ин аввалин маротиба дар таърихи ҷудои мамлакат маҳсуб аст, ки ҷудокорони кишвар ба гирифтани се нишони ифтихорӣ дар як мусобиқа мушарраф гардиданд.

Тоҷикистон дар бозиҳоҳои “Abu Dhabi Grand Slam 2021” бо як нуқра, ду биринҷӣ ва як ҷои панҷум дар байни 41 давлати дунё мақоми 12 умро ишғол кард.

Фарҳод Ҷумъазода,

“Машъал”