МУРОҶИАТНОМАИ Маркази назорати давлатии санитарию эпидемологии вилояти Суғд ба сокинон ва меҳмонони вилоят

Маркази назорати давлатии санитарию эпидемологии вилояти Суғд вобаста ба якбора паст шудани ҳарорати ҳаво ва дар ҳукмронии феълии фасли зимистон ба маълумоти сокинон ва меҳмонони вилоят мерасонад, ки бинобар беэҳтиётӣ дар ин фасл эҳтимоли хуруҷи бемориҳои роҳи нафас афзуда, ба бемории зуком ва дигар навъҳои вазнини он оварда расониданаш мумкин аст. Аз ин лиҳоз, пўшидани либосҳои гарм дар рўзҳои сард ва риояи қатъии қоидаҳои беҳдоштӣ тавсия дода мешавад.

Мусаллам аст, ки ҳамарўза аз ҷониби Ҳукумати Ҷумҳурии Тоҷикистон, Вазорати тандурустӣ ва ҳифзи иҷтимоии аҳолии Ҷумҳурии Тоҷикистон, Мақомоти иҷроияи ҳокимияти давлатии вилояти Суғд ҷиҳати пешгирӣ ва табобати коронавируси нави CОVID-19 тамоми тадобир ва чораҳои зарурӣ амалӣ шуда истодааст. Ҳарчанд рӯзҳои охир ҳолатҳои сироятёбӣ ба қайд гирифта нашуда бошад ҳам, он моро хушбин намесозад, зеро дар як қатор кишварҳои Аврупо ва минтақа аз хуруҷи мавҷҳои навбатии бемории короновирус, бахсус навъи “Омикрон” хушдор медиҳанд, ки сироятшиносон омили асосии онро дар риоя нашудани қоидаҳои беҳдоштӣ, бидуни ниқоб ба кўча баромадан ва масофаро риоя накардан дар мавзеъҳои ҷамъиятӣ ва аз ҳама асосиаш нагузаштан аз иммунизатсияи зидди ин беморӣ медонанд.

Коршиносони соҳаи тиб бовар доранд, ки беморони гирифтори штамми нави омикрон ба мисли беморони гирифтори штамми делта ҷиддӣ нахоҳад буд. Аммо, ин маънои онро надорад, ки одамон гирифтори бемории вазнин нахоҳанд шуд. Бемории “омикронӣ”-ро низ мисли ҳолатҳои қаблӣ дарди сар, табларза ва осеби шуш ҳамроҳӣ мекунанд, ки ин аломатҳоро Созмони ҷаҳонии тандурустӣ дар тамоми штаммҳо мушоҳида намудааст. Фаҳмидани он ки кӣ гирифтори “омикрон” ва кӣ аз “делта” сироят ёфтааст, ҳоло аз ҷиҳати клиникӣ қариб ғайриимкон аст. Илова бар ин, дар мавриди гирифторӣ ба “омикрон” ҳамон усулҳо ва доруҳое, ки барои намудҳои қаблӣ буданд, самаранок мебошанд.

Эмкунии бустерии (ваксинатсияи такрорӣ ё реваксинатсия) одамони пурра ваксинашуда муҳофизати боэътимодро аз COVID таъмин мекунад. Бахусус  ба ҳама насли  калонсолони ваксинашуда тавсия дода мешавад, ки ҳарчӣ зудтар як маротибаи дигар  эмгузаронӣ  карда шаванд. Онҳое, ки то ҳол ваксина нагирифтаанд, бояд фавран эм карда шаванд.

Бояд дар тамоми муассисаҳо новобаста аз шакли молиякият тадбирҳои безараргардонӣ ҳамаруза пурзур карда шавад.

Мо бояд хуб дарк намоем, ки саломатии мо дар дасти худамон аст. Ба роҳ мондани тарзи ҳаёти солим, риояи қоидаҳои беҳдоштӣ, машғул шудан ба корҳои фоиданок, банд намудани фикру зикри худ ба орзую омоли интихобнамудаамон дар зиндагӣ, хушбин будан дар ҳаёт моро аз чанголи ҳамагуна беморӣ мераҳонад.

Таҳлилҳо собит месозанд, ки баъзан шаҳрвандон бо тарсу ваҳм ақидаи худро дучори бўҳрони равонӣ мекунанд, ки он боиси пайдоиш ва хуруҷи бемориҳо мегардад.

Муҳим он аст, ки мо бояд баҳри ҳифзи саломатии худ дар ин фасли сармо аз ҳарвақта дида бодиққат ва баҳуш бошем. Зукоми маъмулие, ки ба он шаҳрвандон дар ин фасл гирифтор мешаванд, бо омилҳои гуногун вазнин омаданаш мумкин аст. Аз ин лиҳоз, танҳо бо тавсияи духтурони оилавӣ муолиҷа намуда, аз худтабобаткунӣ даст кашед.

Он нафароне, ки қаблан ба бемории короновирус ва илтиҳоби шадиди шуш сироёт ёфтаанд, барои барқарор намудани организми худ аз тамоми имконот истифода намоянд. Паст шудани иммунитет ба дигарбора сироятёбӣ ва афзудани беморӣ оварда мерасонад. Ҷиҳати риояи масофа ва қоидаҳои беҳдоштӣ, зуд-зуд тоза намудани ҳавои хона ва ҷойи кор ҳаргиз бепарвоӣ накунед. Оилаҳои сироятшуда ба зукоми табиӣ дидаву дониста фарзандони худро ба муассисаҳои таълимӣ нафиристанд, ки ба саломатии дигар шаҳрвандон хатар эҷод мекунанд.

Борҳо таъкид намудем ва боз ҳам мегўем, ки ҳамагуна маъракаҳои хонаводагӣ ва ҷамъиятӣ дар шароити феълӣ хатарнок арзёбӣ гардида, ба пайдоиш ва хуруҷи бемории короновирус мусоидат хоҳад намуд. Аз ин лиҳоз, шаҳрвандонро зарур аст, ки ба хотири нигоҳдошти солимии худ аз ин маъракаҳо муддате худдорӣ намоянд.

Маркази назорати давлатии

санитарию эпидемологии вилояти Суғд