МАШВАРАТИ КОРӢ БО КИШОВАРЗОН ВА ФАЪОЛОНИ ҶАМОАТИ ДЕҲОТИ МАСТЧОҲ

Дар машварат масъалаҳои омодагӣ ба кишти баҳории зироатҳои барвақтӣ, омодагии иншооти обрасонӣ ба мавсими нави обёрӣ, баланд бардоштани ҳосилнокии зироатҳо ва дигар масъалаҳои марбут ба соҳаи кишоварзӣ мавриди таҳлилу баррасӣ қарор дода шуданд.

Дар оғоз муовини якуми раиси ноҳия Муллосоқӣ Атовуллозода доир ба дастовардҳои соҳаи кишоварзии ноҳия дар соли 2022 маълумот дода, иброз дошт, ки дар натиҷаи андешадани тадбирҳои муассир ҳаҷми маҷмуи маҳсулоти кишоварзӣ ба 1 млрд. 417 млн. 426 сомонӣ баробар гардида, назар ба як соли пеш мутаносибан ба 190 млн. 499 ҳзр.200 сомонӣ афзоиш ёфтааст.

Раиси ноҳия бо таваҷҷуҳ ба болоравии нархи маҳсулоти сабзавотӣ ва таъмини фаровонии бозорҳои истеъмолии ноҳия бо маҳсулоти худӣ ба масъулини соҳа ва раисони хоҷагиҳои деҳқонӣ дастур дод, ки ба кишт ва парвариши маҳсулоти сабзавотӣ, аз ҷумла пиёзу сабзӣ ва картошка тибқи дурнамои кишти зироатҳо барои соли 2023 тадбирҳои зарурӣ андешанд.

Ба иттилои Раёсати кишоварзии ноҳия соли 2023 тибқи дурнамои рушд масоҳати кишти зироатҳо аз ҳисоби полезиҳо ва сабзавот, инчунин картошкаи барвақтӣ назар ба соли 2022 зиёд гардидааст.

Бо ин мақсад ба масъулини соҳа, фаъолон ва роҳбарони хоҷагиҳои деҳқонии ҷамоати деҳоти Мастчоҳ супориш дода шуд, ки сохтори кишт тибқи дурнамо дар ҳудуди ҷамоат риоя карда шуда, ба кишту парвариши пунбадона ва сабзавот диққати аввалиндараҷа дода шавад.

Ҳамчунин, таъкид карда шуд, ки ҷаҳати дастрас намудани тухмии хушсифати зироатҳо ба кишоварзон, сармоягузорӣ ба хоҷагиҳои деҳқонӣ аз ҷониби корхонаҳои пахтатозакунӣ ва соҳибкорон, инчунин тақсимоти одилонаи об аз тарафи иттиҳодияҳои истифодабарандагони об тадбирҳои мушаххас амалӣ карда шаванд.

Дар идомаи машварат раиси ноҳия Аъзам Ализода аз фаъолон ва соҳибкорони ҷамоат даъват ба амал овард, ки дар ободонии маҳал, кӯчаҳо ва роҳҳо саҳмгузор бошанд.