Вохӯри бо аҳолии деҳоти Мастчоҳ

14 январ дар деҳоти ноҳияи Мастчоҳ вохӯрии муҳим бо иштироки раиси ноҳияи Мастчоҳ ва роҳбарони сохторҳои қудратии ноҳия ва аҳолии маҳаллӣ баргузор гардид. Ҳадафи асосии вохӯрӣ шарҳу тавзеҳи нуктаҳои муҳими Паёми солонаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон буд.

Дар ҷамъомад, ки бо иштироки намояндагони созмонҳои қудратӣ ва ҷамъияти маҳаллӣ баргузор гашт, прокурори ноҳия Абдуллоҷон Абдуллозода, сардори ШВКД дар ноҳия Муҳаммадӣ Қосимзода,  судяи Суди ноҳия Муҳсин Убайдзода, комиссари ҳарбӣ Исмоил Орифзода ва сардори шуъбаи КДАМ дар ноҳия иштирок ва суханронӣ намуданд.

Раиси ноҳия Аъзам Ализода дар оғози вохӯрӣ Паёми Пешвои миллатро муҳимтарин ҳуҷҷат барои рушди кишвар ва таъмини субот дар ҷомеа арзёбӣ карда, таъкид намуд, ки Паёми имсола барои ҳар як шаҳрванди кишвар зарурати ҳамоҳангӣ ва ҳамкории мақомоти давлатиро бо мардум барои иҷрои нақшаҳои давлатӣ ва беҳбудии вазъи иқтисодӣ ва иҷтимоии мамлакат тақозо мекунад.

Ӯ аз аҳолӣ даъват намуд, ки ба ислоҳи камбудиҳо, иҷрои қонунҳо ва иштироки фаъолона дар татбиқи барномаҳои давлатӣ диққати аввалиндараҷа дода, бо пайгирии ҷиддии мантиқии паём ва амалишавии дастуру супоришҳои Пешвои миллат, дар рушди иқтисод, тартиботи ҷамъиятӣ ва устувории амният саҳм гузоранд.

Прокурори ноҳия Абдуллоҷон Абдуллозода дар мавзуи масъалаҳои ҳуқуқӣ ва иҷрои қонунҳои кишвар суханронӣ карда, нақши мақомоти прокуратура ва аҳамияти риояи қонунҳоро баён кард. Вай барои пурзӯр кардани мубориза бо ҷинояткорӣ ва нигоҳ доштани тартибот дар ноҳия пешниҳодоти муҳим дод.

Прокурори ноҳия дар суханронии худ масъалаҳои риояи қонуният, пешгирии ҷинояткорӣ, пардохти ҳаққи истифодаи нерӯи барқ, оби полезӣ, пардохти саривақтии андозҳои маҳаллӣ, инчунин ҳамкории зичи шаҳрвандон бо мақомоти ҳифзи ҳуқуқро ба миён гузошта, ба аҳолӣ барои саҳмгузорӣ дар амнияти ҷамъиятӣ муроҷиат намуд.

Муҳаммадӣ Қосимзода, сардори ШВКД, зимни суханронӣ ба мавзӯъҳои мубориза бо терроризм, экстремизм ва баланд бардоштани ҳушёрии аҳолӣ дар шароити мураккаби ҷаҳонӣ таваҷҷуҳ карда, вазъи амниятиро дар ноҳия ва зарурати ҳамкории тамоми шаҳрвандон бо мақомоти қудратӣ барои рафъи масъалаҳои эҳтимолии амниятӣ махсус таъкид намуд. 

Ҳамчунин сардори ШВКД Муҳаммадӣ Қосимзода дар баромадаш ба масъалаи таълиму тарбияи насли наврас, махсусан дар пешгирии ҷинояткорӣ дар байни ноболиғон, рӯ овард. Вай таъкид намуд, ки амалишавии барномаҳои тарбиявӣ ва пешгирии ҷиноятҳо дар байни ҷавонон нақши муҳим мебозад. Сардор изҳор дошт, ки барои коҳиш додани ҷинояткории ноболиғон ва таъмини субот дар ҷомеа, кӯшишҳои ҳамоҳангии маориф, мақомоти қудратӣ ва ҷомеа зарур аст. Вай инчунин ба аҳолии маҳаллӣ пешниҳод кард, ки бо мақомоти қудратӣ дар масъалаи таълиму тарбия ва пешгирии ҳолатҳои номатлуб ҳамкорӣ намоянд.

Муҳсин Убайдзода, судяи Суди ноҳия, дар бораи аҳамияти адолат ва нақши аҳли суд дар иҷрои суду ҳукмҳо суханронӣ карда, ба аҳолӣ маслиҳат дод, ки дар ҳама ҳолатҳо ба қонун ва равандҳои ҳуқуқӣ эҳтиром гузоранд. Мавсуф ҳамчунин барои гузаронидани раванди судӣ дуруст ва ба фоидаи ҷомеа таъкид намуд, ки ҳамаи тартибот ва қонунгузории дар кишвар амалкунанда бояд бамаврид татбиқ шаванд.

Инчунин, Муҳсин Убайдзода изҳор дошт, ки таъмини забономӯзии хонандагон ва кӯмак ба таҳсил дар муассисаҳои таълимӣ дар ноҳия бояд аз диққати махсуси волидайн ва ҷомеа бархӯрдор бошад. Вай ба аҳолӣ барои таҳкими сатҳи забономӯзии фарзандони худ ва шуғли онҳо ба таҳсил тавсияҳои муҳим дод.

Исмоил Орифзода, комиссари ҳарбии ноҳия дар бораи аҳамияти иҷрои уҳдадориҳои шаҳрвандӣ, аз ҷумла хидмати ҳарбӣ ва риояи қонунҳои мавҷуда изҳори назар намуд.

Вохӯрии мазкур бо шунидани саволҳо аз ҷониби аҳолии маҳал ва посухи роҳбарони сохторҳои қудратӣ ба итмом расид. Дар маҷмӯъ, вохӯрӣ барои таъмини пешравии иҷтимоии ноҳия, тақвияти раванди амният ва роҳнамоӣ ба аҳолии деҳоти Мастчоҳ дар иҷрои Паёми Пешвои миллат, муфид ва самарабахш арзёбӣ гардид.

Дафтари матбуоти

Раиси ноҳияи Мастчоҳ